我細女第一次上鏡講嘢.... 你的月亮又如何呢? 

《第108故事分享: 公主的月亮及Johari Window》

從前有個公主由細到大都好鍾意望住個月亮， 佢好多時一望就望足成晚， 因此成日都冷親發病。

有一次公主大病緊嘅時候， 佢仲想要去花園望月亮。國王好擔心就問佢: 「你點樣先可以唔好成日為左望月亮而冷親呀?」

公主就話如果國王可以幫佢擇個月亮落嚟呢，就以後唔使望住佢啦 。

國王之後就召集晒全國嘅聰明智士研究各種方法點樣擇到個月亮落嚟。 

有人就話個月亮起碼去到成鄰國咁遠， 黐住喺個天空，無可能擇落來。 又有人話月亮起碼成個皇宮咁大， 摘咗落嚟都冇位放。 又有人話月亮應該係個螢光氣體壓縮而成，無人能夠捉得住佢。

係個個大臣議論紛紛嘅時候， 有個宮女細細聲話:「點解無人問下呀公主佢點諗嘅?」

宮女問:「公主呀， 你覺得個月亮有幾大呀?」

公主回答:「大概我手指公咁大啦!」

宮女再問:「咁你覺得個月亮有幾遠呀?」

「我成日都見到月亮掛係前面棵樹上面， 大概嗰度咁遠啦!」

「公主呀，咁你覺得個月亮係咩做㗎?」

「咁靚，硬係黃金啦?」

就係咁，國王就馬上叫人用黃金做咗個手指公咁大嘅吊咀，假裝係棵樹上面摘落嚟俾呀公主， 吊喺佢條頸度。又就係咁， 公主就馬上病好。

佢擁有咗個月亮之後就好開心， 可惜下一個問題就馬上嚟啦。 國王心唸，擇個月亮落嚟之後，如果公主佢第二日又見到個月亮繼續喺個天空度，咁咪穿煲囉?!

於是有人提議不如搵個黑沙罩住個皇宮，有人提議不如晚上放煙遮住個天空， 人提議晚上唔好再畀阿公主行出花園， 種種嘅方法都好似唔係太可行。宮女又細細聲講:「點解又無人問下呀公主佢點諗呢?」

公主點答呀? 

公主回答:「 月亮摘咗落嚟之後，梗係會生番個出嚟啦。 我隻牙齒甩咗，都會生返喇。有乜問題呀?」

就係咁，問題就解決啦! 故事帶出乜嘢理念? 

凡事唔好成日淨係自己諗埋一邊， 估下估下，不如多問對方意見， 答案可能更加清晰。 

根據美國兩位著名心理學家 Joseph Luft 同埋 Harrington Ingham， 係1955年發明咗一個叫做 Johari Window (周哈里窗 - 以佢哋兩個人嘅名為名)，用56個 adjectives 形容詞，展示咗關於自我認知、同其他人對自己嘅認知之間，在有意識或無意識情況下嘅差異。由此分割為四個範疇: 

(1) 人知，我都知 (又叫做 Open / Free Area ，開放我) - 例如: 我專買舖，係人都知

(2) 人知，我唔知 (Blind Area，盲目我)，即是盲點 - 我以為自己好有型，但其實個個都覺得我好樣衰， 但冇人同我講

(3) 人唔知，但我知 (Hidden Area，隱藏我) - 其實我 我內心世界係一隻小綿羊， 好怕俾人呃

(4) 人唔知，我都唔知 (Unknown Area, 未知我) - 原來我識得飛天， 但你同我都唔知

做人嘅目的，就係希望盡量將呢個open同free 嘅 area盡量打開， 咁你就更加能夠了解/改善自己，人哋又更加能夠明白/信任你。 由於你嘅自我認知 (self-awareness) 同埋別人對你嘅了解 (understanding by others) 範圍大咗，咁樣你嘅發揮同埋被接納嘅空間亦同樣增大啦。

點做? (1) 主動問多啲，feedback solicitation, 就會更易令你睇到自己盲點。 例如: 唔主動問都唔知原來嗰個人都覺得我樣衰， 咁我咪打扮得好啲，個格都執返好啲啦。

(2) 主動講多啲自己嘅唸法， 甚至乎多披露自己脆弱嘅內心世界，self-disclosure or exposure， 就會令到其他人更加明白你， 續而更加信任你。 例如同人講:「我心入面有隻小綿羊 ，怕畀人呃， 我要耐啲時間先同到人friend到， 我比較慢熱!」

主動問多啲，講多啲， 透過 other's observation (別人觀察), self-discovery (自我發現), 同埋 shared discovery (人哋同你自己共同發現) 去發掘你嘅unknown area (未知我) ， 呢個 area 框住個位， 亦都係叫做你嘅 potential (潛能)啦。 

有啲地方你可以繼續收埋唔畀人知， 有啲地方就係始終人哋知，但你自己唔覺。 唔重要， 最重要就係個 total open area大咗，咁你都升呢咗。

好似上面個公主咁，問多啲，講多啲，你懂啦!