【2021新機】小米POCO M3 開箱 Xiaomi PocoM3 Pocophone

小米旗下嘅品牌POCO一直都以性價比高見稱，除咗旗艦系列之外，POCO M3以低於港幣1000蚊嘅價錢賣街，配置就超晒入門級數！睇Spec就好OK喇，今日就同大家做個開箱！

部機嘅尺寸同 iPhone 12 Pro Max差唔多，機背嘅皮革設計睇落亦唔似一般入門機咁「膠」。6.53寸嘅LCD Mon唔算失禮，不過水滴屏幕睇落就無開孔屏幕咁高貴。呢部機有內置64GB同128GB兩個選擇，支援2張Nano-SIM同1張外置記憶卡嘅真三卡設計，咁就唔怕空間唔夠用啦！

試埋部機本身先，POCO M3用咗高通Snapdragon 662 處理器，比起入門機通常用嘅4系處理器高級，記憶體方面亦有4GB，足夠大部份情況嘅使用。首先等我試吓開多幾個App睇下部機掂唔掂先！表現正常，無Lag嘅情況！無論睇片定係有多行走馬燈嘅新聞資訊節目，一樣唔Lag唔窒，以呢個入門價位嚟講，當然收貨啦！

POCO M3嘅相機又掂唔掂呢？以正常嘅相機模式影張相先！雖然冇自動對焦， 不過 影出嚟嘅效果算唔錯同實在，再放大睇睇，Detail位雖然唔係完全保留，但就無好模糊嘅情況。俾多兩張夜景相大家睇睇！ 收貨！

再試一試個上網表現。用Speedtest測試4G嘅速度，連接Wi-Fi方面，呢部機雖然唔支援Wi-Fi 6，但Wi-Fi 5 即係 802.11ac 嘅速度都唔差㗎！

呢部機嘅插頭用咗USB-C，喺入門機嚟講算一大進步，因為咁亦都支援18W嘅快充，配合6000mAh嘅大電，用咗部機做Second Phone幾日，收發下工作WhatsApp、睇下Youtube、上下社交媒體同埋做下Speedtest，用咗日幾睇番仲有40%以上嘅電，電量表現一流！

另一個加分位係部機嘅指紋辨識放喺機身側邊開關掣，用喺上來我覺得方便過在放喺機背，亦唔影響機背嘅設計，值得加許！

呢部機64GB版本官方價係HK$949，128GB版亦只係HK$1049，自己做Second Phone定買俾屋企人用，都係一個好選擇！

#POCO M3 #PocoM3 #XiaomiPocoM3