潮流就興食素食，不過好多時要搵素食都唔係咁容易，今日嚟到台北呢一間餐廳入面就有好多特別嘅素食，有啲乜嘢食呢？即刻同大家睇下！

今日要介紹嘅就係呢間 MiaCucina。一入到嚟，已經感受到呢度崇尚天然同埋舒適嘅氣氛。打開餐牌，見到大部份嘅菜式都係用蔬菜配合雞蛋、牛奶、同埋芝士等食材製成嘅蛋奶素，喺繁囂嘅都市入面，
呢個餐牌又真係有啲脫俗嘅感覺喎。

今日我就揀咗幾個特色嘅菜式。前菜我揀咗呢款瘋狂西蘭花，因為一般嘅沙律都係用生菜同埋紅蘿蔔配合唔同嘅果仁，好少會揀西蘭花做沙律。廚師刻意揀咗最新鮮嘅西蘭花頭，配合少量嘅紫甘藍、洋蔥粒同埋果仁等等，加埋特製嘅醬汁，口感新鮮又新奇，作為前菜就啱晒喇。

跟住介紹嘅呢個小食係香蒜野菇。呢道菜式將打碎咗嘅蘑菇配合蒜蓉、意大利葡萄醋、黑椒同埋其他香料加埋少少嘅芝士製成，唔使點任何醬汁都已經香味十足，唔好睇小呢道菜式啊，每日都好快賣晒架！

跟住介紹埋呢個三重芝士 Panini 帕尼尼。Panini 嘅意思係有餡料嘅麵包，而呢份三重芝士 Panini 就夾咗 Mozarella、車打同埋巴馬芝士，再用適中嘅熱度將芝士混合溶化，睇見真係又香又想食啦！

我仲叫咗個 Pizza 同埋兩杯嘢飲慢慢嘆，享受下呢度嘅氣氛。MiaCucina 喺台北有幾間分店，今次我就嚟咗中山區三越百貨嘅呢間分店，你都可以去佢哋嘅 Instagram 搵到分店嘅資料㗎！




MiaCucina

https://www.facebook.com/Miacucinafamily/

https://www.instagram.com/miacucina_tw/